Өкмөт “Түндүк электр” сыяктуу компаниялардын баарын бириктирүүнү көздөп жатат

34

Учурда мамлекеттик төрт чоң бөлүштүрүүчү компания бар. Алар — “Түндүк электр”, “Чыгыш электр”, “Ош электр” жана “Жалал-Абад электр”.

Энергетика жана өнөр жай министри мамлекеттик бөлүштүрүүчү энергокомпанияларды бириктирүү мүмкүнчүлүгүн карап жатат. Бул тууралуу министрликтин Электр энергетика башкармалыгынын жетекчиси Марат Жээнбеков билдирди.

Ал бүгүн Sputnik Кыргызстандын маалымат борборунда өткөн брифингге катышты.

“Энергокомпанияларды чыңдоо үчүн аларды бириктирүү тууралуу сөз болуп жатат. Азыр баары иликтенип, анализ жасалууда. Бардык реформанын алдында иш канчалык натыйжа берерин карашыбыз керек. Эгер анализ экономикалык жактан пайда алып келсе, электр тогун бөлүштүрүүчү жана чыгаруучу компаниялар бириктирилет”, — деди ал.

Буга чейин энергетика жана өнөр жай министри Доскул Бекмурзаев ведомство кыскартууларга жана чыгымдарды оптимизациялоого барышы керектигин айткан.

“Тарифтер энергетикалык компаниялардын чыгымдарына жараша түзүлөт. Бардык чыгымдарды кыскартып, оптимизация кылышыбыз керек. Бизде азыр төрт чоң бөлүштүрүүчү компания бар — “Түндүк электр”, “Чыгыш электр”, “Ош электр” жана “Жалал-Абад электр”. Алар жадагалса керектүү жабдууларын толугу менен сатып ала албайт, түшкөн каражат чыгымдарын жаппайт. Андыктан бириктирүү тууралуу кеп козголду. Мисалы, азыр бир компания жабдууну бир жерден алса, экинчиси башка жактан алат. Анан сапаты жагынан аксайт”, — деди Бекмурзаев.

Ошондой эле ал баарын бириктирүү менен энергетика тармагында реформа жасаларын белгилеген.

Sputnik.kg