Кара-Суунун жаңы акими кримтөбөлдүн өкүл баласы экенин ырастады

543

Буга чейин айрым ЖМКлар жаңы дайындалган акимдин уюшкан кылмыштуу топко аралашканын жана кримтөбөл Алмазбек Бокушевдин өкүл баласы экенин жазышкан.

Ош облусунун Кара-Суу районуна жаңы дайындалган аким Турусбек Ногоев өзү тууралуу айтылып жаткан маалыматтарга комментарий берди.

Буга чейин айрым ЖМКлар ал уюшкан кылмыштуу топко аралашкан жана кримтөбөл Алмазбек Бокушевдин өкүл баласы деп жазышкан.

Аткаминер Ногоев кримтөбөлдүн өкүл баласы экенин ырастап, бирок уюшкан кылмыштуу топтун мүчөсү эмесмин деген комментарийин берди.

“Мамлекеттик кызматтарда болгон аракетимди жумшап, элиме ак кызмат кылып келе жатам. Мен жөнүндө тарап жаткан маалыматтардын баары жалган. Өмүрүмдө кылмыш жасаган киши эмесмин. Мен 1994-жылы мугалим болуп иштегем. Ал кезде Алмаз Бокушев мектепте машыктыруучу эле. Кыргызда өкүл ата шайламай салты бар. Ошол жылдары үйлөнгөнүмдө ата-энемдин каалоосу менен аны өкүл ата кылгам. Андан кийин экөөбүз өз жолубузга түшкөнбүз. Бири-бирибиз менен жумушка байланыштуу катышыбыз жок. Мурда жамандык-жакшылыктарда гана көрүшүп калчубуз”, — деди Ногоев

Аны менен катар жаңы аким районду өнүктүрүүгө тажрыйбасы да, билими да жетиштүү экенин билдирди.

“Чоң пландарым бар. Кара-Суу өлкөдөгү эң чоң район, анын социалдык-экономикалык абалын көтөрүүгө, сырттан инвесторлорду тартууга, чын дилимден ак кызмат өтөөгө бүт күчүмдү жумшайм. 2014-жылдан бери Жайыл районунун өсүп-өнүгүүсүнө болгон аракетимди көрүп, бир катар долбоорлорду аткардык”, — деди Ногоев.

Турусбек Ногоев 51 жашта, Чүй облусунун Жайыл районунун Бекитай айылында туулган. 1991-2010-жылдары мектепте мугалим, директор болуп иштеген. 2011-жылы ушул эле районго акимдин орун басары, 2014-жылы аким болуп дайындалып, ушул кезге чейин иштеп келген.

Кара-Сууну сегиз жылдан ашуун башкарган Тилек Матраимов былтыр октябрь окуяларынан кийин кызматтан кетип, анын орду жети ай бою бош турган.
Sputnik.kg