Билим берүү министрлиги менен соттошуп жүрүп Сузак райондук билим берүү  бөлүмүн башчылыкка келген Алмаз Бечеловдун кызматын кароо боюнча акимчилик министрликке эки жолу кызматын кароо боюнча сунуш  жиберишти. Мындай маалымат КРнын Өкмөтүнүн Жалал-Абад областындагы ыйгарым укуктуу өкүлүнүн орун басары Ырысбек Ызабеков, КРнын маданият маалымат жана туризм министрлигинин областтагы координатору Рахматулла Козукеев баштаган бийлик өкүлдөрүнүн катышуусунда  социалдык тармактын иш планын иштеп чыгуу, маданий мекемелердин абалы талкууланган жыйында айтылды. Мындагы жыйында билим берүү тармагын жакшыртуу, окуучулардын билим деңгээлин көтөрүү маселелери да козголуп, Сузак райондук билим берүү бөлүмүнүн башчысы Алмаз Бечеловдун ысымы аталды. Тактап айтканда Сузак райондук мамлекеттик администрация 9 айдын жыйынтыгы жана жылдын жыйынтыгы чыгарган коллегиянын чечими менен КРнын Билим берүү жана илим министрлигине бөлүм башчы Алмаз Бечеловдун кызматын кароо боюнча  сунуш беришкен.

Буга чейин  А.Бечелов  2014- жылы Сузак райондук билим берүү бөлүмүнүн башчысы болуп билим берүү жана илим министринин буйругу менен дайындалган. Бирок ошол мезгилдеги район акими Н.Мирзахмедов райондук билим берүү бөлүмүнүн башчысын дайындоого район жетекчилиги менен макулдашуу болбогонун жана башка себептерди айтып, анын кызматка келүүсүнө каршы болгон. Мындан улам министрлик буйругун эки аптадан кийин кайтарып алган. Бул абалга нааразы болгон Алмазбек Бечелов министрлик менен соттошуп, кийин кайрадан соттун чечими менен кызматына кайра келген.

Жумагул Шайыкова